شد الحزام - ألحان سيد درويش غناء فرقة الموسيقى العربية

شد الحزام على وسطك غيره ما يفيدك

لابد عن يوم برضو ويعدلها سيدك


ان كان شيل الحمول على ضهرك يكيدك

أهون عليك يا حُرّ من مدّة إيدك



ما تيلّا بينا انت وياه ونستعان ع الشقا بالله

وآهو اللى فيه القسمه طلناه واللى ميجيش ان شالله ما جا

مادام بتلقى عيش وغموس يهمك ايه تفضل موحوس

ماتحط راسك بين الروس لا تقوللي لا خيار ولا فقوس



هقولك ايه واعيدلك ايه كله له آخر

دى خبطة جامدة وجت على عينك يا تاجر

يا وحستك دلوقت لا وارد ولا صادر

يحلها ألفين حلال ربك قادر



قوللي فى عرض النبي يا حسين رايحين نلاقيها منين ومنين

والاش متجوز اتنين، يا دنيا غوري جاتك البين

شوفوا البخيل يفضل منحوس ولو علقوا على بابه فانوس

فلوس دي ايه سكت يا جاموس هيا السعادة في غنا النفوس



قرب شيلني شيل عمر الشدة ماتطوٍّل

قرب شيلني شيل بكرة نهيص زى الأول

لا تقوللي كتير وقليل بكرة نهيص زى الأول

هيلا هيلا هيلا هيلا، هيلا هيلا هيلا ليصه

كلمات : بديع خيرى

ألحان : سيد درويش